'n GEBED:

(Ds. Dirkie van der Spuy - NG Kerk, Morelettapark)

Here Jesus, dankie dat U vandag vir ons help om op 'n nuwe manier na die kruis te kyk en ook met Hemelvaart op 'n nuwe manier na die hemel te kyk. Here, dankie dat U vandag se: My kind Ek sien jou seer en Ek sien die onreg van hierdie wereld. Ek sien die pyn in jou hart. Ek sien die vrae en die verwarring en die moedeloosheid wat inkruip,, maar Ek wil jou verseker Ek ken hierdie pad, Ek het dit ook gestap en Ek weet dit is 'n geloofstryd, hou vas aan My, want Ek is met jou. O Here Jesus, dankie dat U vandag hier is, wil U net in die stilte vir elkeen wat swaar en seer het help om U raak te sien. Here, as ek my nou terugdink aan daardie seer en daardie swaar oomblikke, aan my kruis in my lewe, open as*eblief my oe Here dat ek U sal raaksien wat hier by my is. Open my oe Here dat ek U sal sien wat by my bly vir altyd, wat my nooit sal verlaat nie. Dankie Here, U is die Een wat getrou bly en niks kan U liefde vir my breek nie. U liefde bly trou tot in ewigheid. Here kom maak ons in hierdie oomblikke net bewus van U teenwoordigheid, van U liefde, van U troos en kom rig ons op om die geloofstryd te volstry. Kom rig ons op Here om hierdie wedloop te voltooi, om hierdie geloofspad te hardloop tot ons ook kan se, dit is volbring. Ek het voluit gehardloop, my oe gerig op U, Jesus my Here en my Leidsman. Ons prys U Naam. Amen.